SECRETARY’S REPORT, ZYO DB 2008-2009
ZOTON, DELHI 24 NOVEMBER’ 2009.

March 29, 2008 ni Safdurjung Enclave a incharge kipieh zou apat tunitan in kum 1, ha 7 leh ni 25 chingta hi. Kumni sung in nasep silbawl tamkuom kibawl a, khotang kikhelna zong hing tun hi. Bawl khiel, sep chinglou leh na ngaidan utoh kituoh lou sil bawlkhah aum a ahileh na ngaidamna uh kahing ngen masa pen hi. Sil kibawlte ahileh inam ngainatna liulieu leh mailam khuolna toh kibawl ahi chi mipiten chiengtah a ithei ding uh ka lamen a, khut-le-khut kitu a semkhawm jel ding in iki chiel hi.

Tam term sung in Meeting agawmin 12 ana kinei hi. Tuate lah ah Executive Body meeting 4, General Body meeting 4, ZSP toh Join meeting 4 ana kinei thei hi. Meeting teng abawn a tahlang zolou ding ihiman in akul leh poimawzaw teng en vai.

Zou Organisation Delhi (ZOD) min a incharge March 2, 2008 a kilazou in septhei dandan in ana kisem tou hi. Anai, agamla chi umlou in panpi ngaite panpi ding in khosuh khovai ana kituan hi. Tuachin November ha hingtung a,
innlam, Manipur a i philanthropic organization neisun Zou Youth Organization apat laithot, “ZYO Delhi Branch phut/hong ding a theisahna” anaki muta hi. General Headquarter in mawpuohna apieh bangin Pu Chinlunthang, Project Secretary ZYO Gen HQ., in ZOD leh ZSP toh houlim dingin meeting hing han hi. November 23, 2008 in Pa Zamlunmang inn, Munirka ah Join cum General Meeting kinei a, Delhi/ NCR a um Zoutate’n ZOD hinonloua ZYO a kipuoh ding thugun ana kigen khawm hi. Observer in Pu Ginsuonhau, Pu Manglienthang leh Pu S. Dalthang te zong pang uhi. Member tamzawten ZYO Delhi Branch phudoh ding in phasa nanleh khatvei toukhawm a phudoh ding lem kisa lou in khatvei toh toukhawm kia ding in hunguot kibawl hi.

November 29, 2009 nitah dah 5 in Pa Khakhai Zou inn, Vasant Vihar ah General Body meeting kinei a, Project secretary pu zong pang thei nalai a, meeting dang sanga tamzaw mipi peikhawm hi. Tuachin mipi tamzawte deina toh tuni 29/11/2009 a kisuhkhawmna ah Zou Organisation Delhi (ZOD) khu Zou Youth Organisation (ZYO), Delhi Branch a amin hendoh (changed) ahita hi.

Republic day 2009 ni in tukum adia General Body meeting masa ana kinei hi. Nampi thumkhawmna leh ZOTON manding in pha ana kisa hi. ZYO registration leh fund don pat ding in zong lem kisa hi. Hun hing peijel in Independence day angtungta hi. Tuani in Pa Zamlunmang inn ah General Body meeting khat kinei kia a ZOTON manding in thutanna kinei a registration leh fund kidongdohte kaikhawmna zong kinei hi. Tuni tan a registration kibawldoh ahileh milip
257 pha a fund kidongdoh ahileh Rs. 19, 000 (rounded-up) pha hi. Kumdang sanga registration bawl leh fund kidongdoh tamzaw a muthei ahiman in lungdam huai mama hi.

Tualeh, lusuunni a kivaipuoh dingdan genchiengna zong kibawl a tambang in vaihawmna kinei hi. Lusuunna (condolence) mun a nasep silbawl zousie, ZYO in amawpoding hi. Hattuom (Church) in vaiguon/programme abawlding a tuanah ZYO zong hun apeding a atuongsah ngey ding ahi. Hattuom neilou aumkhah a ahileh ZYO in silbangkim asai ding hi. Puonvom, black board leh donation box te lei a zahpat ding in thukimna kibawl hi. Theiding a poimaw ahileh “donation box “ khu Pa Paukhanlian te tunnu (L) Ngaikhanmang sunna vaiguon (condolence), Push Vihar a zahpat ahita hi. Tamte ahileh mailam hun a vai iki puoh ding dan uh ahi a, ahoizoding a thei ium leh ngaidan daan bangtah a piehthei zing ahi.

Nite liem zungzung in kum hingbeiding kisata a, ZOTON manding leh Election kikhel thei khong ding in hing umta hi. Tuachin October 04, 2009 in Executive Body meeting Presidentpu innah ana kinei hi. Meeting in ZOTON Celebration Committee dinkhieh ahia tam anuoi ate muongtah a panmun guon ahi uhi.
Chairman : Pa Haulienkap
Secretary : Pa T. Zamlunmang

Finance/ Treasurer : Pa S. K. Mung
Committee member: Delhi/ NCR a um Zou papiteng.

Muongtah a iguot bangin amaute ban ah mikiphal leh tawmngai bangja ekhat ten nasep panpei ua, tuni in haibang a ingahla uh ZOTON 2009 melmuthei in iumta uhi. Kum 2010-2012 sung vaipoding telna General Election khu Headquarter thupieh leh Constitution bu a umbangin November 2 a neiding in hunguot ahia; Election commissioner ding in Pa John Zamkhomang, Advsor ZYO DB leh Tv. Khaibiaklian Zou, President ZSP DB te muongtah a guot ahi uhi. Amautegel in feltah leh lungkimhuoitah in ang saisah ua, Pa Haulienkap inn ah Kitelna kinei a, tam aney ate 2010-2012 sung vaipoding a telching ahi uhi.
President : Pa Khakhai Zou
Secretary : Pa T. Zamlunmang Zou
Finance/ Treasurer : Pa S. K. Mung
Panmun dangte kumtawp masangtey aguonbe ding in hoi kisa hi. Mangpan amaute tunglam leh leilam pilna toh mapui zing tahen.


ZYO, Delhi branch in nasep silbawl (activity) tuomtuom zong ahitheitan in ana bawltou hi. Damloute bang lamkaite in va veh in, panpi ngaite panpi ding in mansan na umzing uhi. Sawtkuomtah Delhi a ana posting leh Zoutate’n ina kiletsahpi khat uh Pa Lamkholun te innkuon hahkhiehna programme Pa Khakhai Zou innah March 2008 in ana kinei hi. Tuachiengleh, 15th August meeting thupuasah dungjui in ZYO DB lamkaite’n Noida vehna kinei hi. Poimawna neite ading in ZYO Delhi Branch in identity card ki bawlsah a, koizong aki register te adingin lamkaite bawlsah thei jel ahi hi.

Zou Youth Organisation khu philanthropic organization ahizieh in welfare activity lam piibawl dieh hi. Adieh in, shina aum chiengleh a lusuun mite lusuunpi , hamuon leh panpi ding in mansan aumzing a nampi in mawpuohna apie hi. ZYO Delhi branch in zong Delhi khopi leh asevel a um Zoutate lungkham lusuunna tuohte tunitan in anabuoipi zing hi. Chiemte thei a um tam aney ate itahlang a, tunin zong amaute isuun nalai uhi:
1. Hausuanlal Simte s/o T. Vummang of Tuibuang. Condolence meeting 19/05/2008 at NTBC church.
2.
Khamzasuan b/o Pu Thangkhai of Muollum. Condolence meeting 05/06/2009 at Zaroda.
3. Ngaihoiching m/o Goubiak and Jacob of Singngat. Condolence meeting 29/06/2008 at Rohini.
4. Benhur Khamzalang Israel f/o S. K Mung. Condolence meeting 2008 at CGH qtr, Vasant Vihar.
5. Ngulzakhup f/o Mangsuonlien(Gurgaon) & Ngaimuong (Vikaspuri) of Hiangtamjang. Condolence meeting 31/01/2009 at CPWD Colony, Vasant Vihar.
6. John Seilienlam b/o T. Thangminlien & Doukhanmang of Zomun. Condolence meeting 28/03/2009 at New Mahavir Nagar.
7. Chingkhoman m/o Nu Sianmuanching of Zomi Colony. Condolence meeting at Safdurjung Enclave.
8. S. Ginzamung@G. Israel b/o S. K. Mung of Beulahlane. Condolence meeting 17/05/2009 at CGH qtr, Vasant Vihar.
9. Liankhogin f/o Nu Chinglianchin of Tuining. Condolence meeting 20/08/2009 at Safdurjung Enclave.
10. Chiinennieng m/o Nuomhoi & ss/o Mannuom of Ngoiphai. Condolence meeting 09/10/2009 at Chawla.
11. Ngaikhanmang m/o Pa S. Paukhanlian of Zoveng,. Condolence meeting 26/10/2009 at Push Vihar.


ZYO, Delhi branch in maban ah sepding tampi inei hi. Gensiet leh mudanate thuohzou ding in nam ngainatna leh iitna toh kithuom vai. Mangpa maah kiniemkhiet un, tuachiin Aman noute a hing tawisang ding hi

Gelding a kilawm leh poimaw, tahlat khahlou, genkhiel genval aum a ahileh na ngaidamna uh kang ngen hi.

ZYO, Delhi Branch damsawt hen.

Sd/-
T. Thangminlien.
Secretary,
Zou Youth Organisation, Delhi Branch.